O Equipo Roca da Compañía da Garda Civil de Carballo con base en Vimianzo detivo a dous homes como presuntos autores dun delito continuado de roubo con violencia e outro de roubo en interior de vehículo na fase de explotación da operación Goldens. A mencionada operación iniciouse a principios do mes de outubro por mor das denuncias interpostas polas victimas en diversas localidades, principalmente da Costa da Morte, causando unha gran alarma social na zona. O modus operandi dos detidos consistía acceder ao lugar dos feitos nun vehículo do que se apeaba un dos detidos, tras establecer unha breve conversación coa vítima abalanzábase sobre ela e mediante un tirón arrebatáballe as alfaias que levaba no pescozo, introducíndose posteriormente no vehículo fuxindo do lugar a gran velocidade.
A maioría das vítimas eran mulleres de avanzada idade que se atopaban soas na súa vivenda, nas proximidades ou en lugares con pouca afluencia de persoas. No transcurso da investigación, os compoñentes de Equipo Roca, tras a análise minuciosa da información solicitada, lograron a identificación dos presuntos responsables dos ilícitos así como a localización e recuperación de gran parte dos obxectos subtraídos, esclarecendo con iso oito delitos de roubo con violencia e un de roubo en interior de vehículo, polos que estas persoas, veciñas de Santiago, foron detidas. Xunto coas actuacións realizadas, foron postos ao dispor do Xulgado de Instrución de Garda de Corcubión, decretando a Autoridade Xudicial o seu ingreso en centro penal. A Garda Civil mantén a operación aberta ao obxecto de pescudar se os detidos son os responsables doutros ilícitos da mesma índole e a recuperación do resto de obxectos subtraídos.