Xa non quedan soldados estadounidenses en Afganistán. O Pentágono confirmou que se completou a retirada total, tras 20 anos de guerra. O último avión C-17 de Estados Unidos abandonaba o aeroporto de Cabul pouco antes da medianoite. Nas horas previas, o grupo Estado Islámico reivindicou o lanzamento de varios proxectís, que non deixaron vítimas. A maioría foron interceptados polo sistema de defensa antimísiles despregado no aeroporto.
O portavoz do Pentágono, John Kirby, explicaba que tras o ataque aéreo de Estados Unidos contra un vehículo en Cabul, «houbo ataques con foguetes, ataques de lume indirecto no aeroporto». «A ameaza segue sendo real, segue activa e en moitos casos segue sendo específica. Estámosnolo tomando moi en serio e farémolo ata o final», aseguraba.
Nas últimas 24 horas, Estados Unidos sacou de Afganistán a 1.200 persoas. A 2.900 o domingo e a case 7.000 o sábado. En total, a 116.000 persoas.