Estados Unidos anunciou este mércores que volve considerar aos rebeldes hutíes do Iemen como “terroristas” no medio da escalada militar que vive Oriente Medio desde o inicio da guerra en Gaza. A designación entrará en vigor o próximo 16 de febreiro, aínda que Washington non descarta suspender a decisión se a milicia xiíta financiada por Teherán cesa os seus ataques a barcos no mar Vermello. O voceiro do grupo asegurou que a decisión de Washington non afecta as súas accións e que os ataques continuarán. O expresidente Donald Trump xa outorgara a denominación de terroristas aos hutíes nunha das súas últimas decisións no cargo, pero o actual presidente, Joe Biden, levantou a medida para que as sancións non agravasen a severa crise humanitaria que vive o Iemen, cualificada por Nacións Unidas durante anos como a maior crise humanitaria do planeta.
35