Estados Unidos asegurou este xoves que non hai acordo para o cesamento do fogo, aínda que confirmou a intención de Israel de facer «pausas humanitarias» diarias de catro horas no norte de Gaza, a fin de permitir a saída de civís.
O goberno estadounidense afirmou ademais que traballa para liberar aos reféns de Hamás e considerou que estas pausas poderían favorecer a súa saída segura, chegado o caso.
Nunha chamada con xornalistas, o voceiro de Seguridade Nacional da Casa Branca, John Kirby, recalcou que Israel está a loitar contra un inimigo -as milicias de Hamás- que está «incrustado na poboación civil, utilizando hospitais e infraestruturas civís nun esforzo por protexerse» e pon nun risco maior ao «inocente pobo palestino».
Pero tamén insistiu en que Israel ten «a obrigación de cumprir plenamente o dereito internacional» e considerou que estas pausas humanitarias son «un paso na dirección correcta porque buscan que os civís teñan «a oportunidade de chegar a zonas máis seguras».
Mentres tanto, miles de persoas continúan fuxindo desde o norte da Franxa cara ao sur, tratando de escapar as bombas israelís.