O presidente do Goberno e secretario xeral do PSOE, Pedro Sánchez, pediu ao Partido Popular que neste tempo que se abriu co novo liderado de Alberto Núñez Feijóo “mire máis á dereita europea e menos á ultradereita española”. Nun acto de partido co secretario xeral do PSOE-M e portavoz socialista na Asemblea de Madrid, Juan Lobato, Sánchez tendeu a man ao PP para lograr “os acordos e a unidade que reclama a cidadanía” por mor da guerra de Ucraína, e pediulle que “non volva ás andadas” e sexa “implacable contra a corrupción”. Ademais, instou a Feijóo a que “non ceda #ante a chantaxe da ultradereita”. Neste sentido, referiuse ao goberno de coalición con Vox en Castela e León que este luns celebra a investidura e salientou: “Chámase violencia de xénero, non se chama violencia intrafamiliar”. Sánchez lembrou que o inimigo de Europa “non está soamente en Moscova, está en París nas eleccións de Francia, está en Madrid e está en todos os proxectos políticos de ultradereita que socavan as bases da convivencia”, concluíu.
27