Unha muller de 43 anos permanece ingresada en estado crítico no Hospital Universitario da Coruña tras unha presunta agresión por parte da súa parella, de idade similar e coa que ten dous fillos. Os feitos aconteceron sobre as tres da pasada madrugada nunha vivenda ubicada no número 21 da rúa Fontecaldeira, que une o casco urbano de Carballo coa parroquia de Sísamo. Segundo fontes consultadas a muller sufriu feridas graves polo corpo, na cara e na cabeza. O presunto agresor deuse á fuga e foi detido pola Garda Civil na Coruña cando pretendía entregarse. A Policía Xudicial da Garda Civil de Carballo abriu unha investigación para esclarecer os feitos.
O delegado do Goberno en Galicia, José Miñones, confirmou que había unha denuncia contra o detido de hai un ano por vexacións e insultos, pero puntualizou que «non había orde de afastamento nese sentido e ambos seguían convivindo xuntos». «É a única información que temos», asegurou.
O alcalde de Carballo, Evencio Ferrero, comentou que espera que a evolución médica da vítima «sexa favorable». «Como desexamos todos», dixo. Ademais, o rexedor confirmou que a vítima rechazara anteriormente asistencia do centro municipal de información á muller.