Durante as próximas semanas o Concello da Laracha intervirá en máis de 300 quilómetros de estradas municipais, 83 quilómetros de pistas forestais e preto de 32 hectáreas de parcelas de titularidade municipal que non están incluídas no contrato ordinario de mantemento de zonas verdes.
Esta campaña que se desenvolve cada ano durante o final da primavera e o verán responde a múltiples obxectivos, como mellorar a seguridade viaria e a visibilidade nas estradas, previr incendios forestais, conservar o patrimonio natural, contribuír ao ornato público e manter limpas as áreas de uso comunitario.
Para axilizar os traballos e acadar unha maior cobertura territorial nun menor prazo de tempo, o contrato foi dividido en cinco lotes adxudicados a empresas diferentes que poden traballar simultaneamente en distintas zonas do municipio.
A campaña principiou en Caión coa limpeza de parcelas municipais situadas máis próximas á praia, e posteriormente actuouse en espazos dotacionais de Cabovilaño. No que respecta á rede viaria, os traballos iniciaranse a próxima semana nas parroquias de Lestón e de Caión, para continuar por Coiro e Lendo e proseguir polo resto do termo municipal.
A previsión é que a primeira volta de actuacións nas trece parroquias remate nun prazo aproximado dun mes. Unha vez finalizada, iniciarase unha segunda volta nas principais vías de titularidade municipal para garantir un mantemento axeitado ao longo do verán.
A campaña anual de roza e desbroce destaca pola extensa cobertura territorial para dar resposta ás demandas da veciñanza e manter en bo estado as infraestruturas e espazos naturais do municipio, e o esforzo económico, xa que supón un gasto de 125.000 euros.