En servizo o novo acceso provisional a Folgoso do Courel


A Xunta puxo en servizo hoxe o novo acceso provisional a Folgoso do Courel, no que investiu 1 millón de euros, e avanzou que en setembro decidirá a solución definitiva para a reconstrución da LU-651.

A conselleira de Infraestruturas e Mobilidade, Ethel Vázquez, xunto co delegado da Xunta en Lugo, Javier Arias, supervisou a apertura deste novo desvío da estrada LU-651, que constitúe o acceso provisional a este municipio, alternativo ao treito cortado da vía autonomica, onde se produciu un desprendemento.

Vázquez Mourelle subliñou a axilidade da Xunta na execución desta obra, tramitada a través dunha declaración de emerxencia. Sinalou que este acceso  comezou a construírse o 24 de maio e en tan só dous meses quedou executado nun contorno moi complexo, aumentando incluso o orzamento previsto en máis de 117.000 €.