O Boletín Oficial do Estado publicou este xoves a norma que elimina con carácter xeral os límites de estatura á hora de acceder á escala de cabos e gardas da Garda Civil para «seguir avanzando na igualdade de oportunidades entre homes e mulleres» e co propósito de favorecer a «captación do talento».
A norma, que entrou neste mesmo xoves en vigor coa súa publicación no BOE, pon fin á exclusión de homes con altura inferior a 1,60 metros e de mulleres por baixo de 1,55, así como a quen medise máis de 2,03, xa fosen home ou muller. Trátase dunha orde ministerial que, a proposta dos ministros do Interior e Defensa, asina o ministro de Presidencia, Félix Bolaños.
Desta forma, modifica unha orde anterior, de 2019, para incluír a supresión do requisito de estatura con carácter xeral, pero como ocorreu no caso da Policía Nacional, advirte de que tal requisito «pode ser esixido para a ocupación de determinados destinos ou para o acceso ao ensino de especialización».