- A Organización Nacional de Transplantes, xunto ás CCAA, pretende reactivar o programa de doazóns, que se viu moi afectado durante a crise
Segundo os datos ofrecidos pola Organización Nacional de Transplantes (ONT), España realizou 274 transplantes de órganos durante a crise sanitaria causada pola COVID-19. Con todo, polas circunstancias sanitarias excepcionais actuais, o número de intervencións reduciuse, aínda que o programa español de transplantes conseguiu manterse aberto e nas últimas catro semanas percíbese unha importante melloría.
A ONT comunicou que ata o pasado 12 de marzo a actividade mantíñase en niveis moi elevados, cunha media de 7,2 doantes e 16,1 transplantes diarios, cifras mesmo superiores ás do ano pasado. Desde o 13 de marzo ata o 19 de maio realizáronse 274 transplantes a partir de 127 doantes (148 renais, 77 hepáticos, 34 cardíacos, 11 pulmonares, tres de páncreas-ril e un de fígado-ril), o que corresponde a unha media de 1,9 doantes e 4 transplantes por día.
A doazón e o transplante son unha actividade esencial do Sistema Nacional de Saúde en España, polo que a ONT, xunto coas comunidades autónomas, puxo en marcha un Plan Post- COVID para reactivar un programa que, como outras actividades, viuse moi afectado durante a crise.
O Plan prevé a progresiva reactivación dos programas de doazón e transplante de órganos, retomando os procedementos electivos (non urxentes), que xa se puxeron en marcha en moitas rexións, e o transplante de doante vivo. Cada centro faino de forma individualizada de acordo á súa situación epidemiolóxica, aínda que o punto crítico é a existencia de circuítos libres de COVID-19.