Por segundo día consecutivo, o número de contaxios novos en España é menor que o de persoas curadas.
En concreto, en 24 horas as probas PCR detectaron 2.944 infectados, fronte a 3.353 altas. O total de curados ata agora achégase aos 96.000, preto do 43% dos infectados detectados.
A cifra de mortos nun día subiu lixeiramente. Contabilizáronse 378 falecidos, once máis que no último informe. Con todo, é a terceira xornada seguida por debaixo dos 400 finados.
Fernando Simón puntualizou, porén, que antes de aliviar o confinamento hai que consolidar esta liña e ter garantida a resposta ante un rebrote.
O responsable de Emerxencias Sanitarias non se atreveu a aventurar para cando poderá haber unha vacina.
Simón dixo que as empresas que traballan no desenvolvemento de posibles vacinas tratan de avanzar ao tempo nas plantas de produción.