- No mesmo punto falecía atropelado un veciño do lugar de 67 anos en decembro de 2014.
Un ciclista resultou ferido de consideración tras sufrir un accidente contra un camión na estrada DP-1909 que une Bértoa (Carballo) con Caión (A Laracha), á altura da curva das Névedas, preto do Rapadoiro, na parroquia carballesa de Noicela. O 112 Emerxencias Galicia pasou o aviso ás 12:37 deste sábado. Ao punto desprazáronse axentes da Garda Civil de Tráfico, sanitarios do 061 e persoal da agrupación local de Protección Civil. O ciclista non chegou a perder a consciencia, pero por precaución mobilizouse ao helicóptero medicalizado con base en Santiago para trasladalo ao Complexo Hospitalario Universitario da Coruña, para ser examinado. O lugar é un punto moi perigoso desta estrada, onde conflúe o acceso a un local de hostalería cunha curva moi pronunciada. O 21 de decembro de 2014 un veciño do propio lugar do Rapadoiro de 67 anos falecía atropelado por un turismo no mesmo punto.