A Agrupación Deportiva Un Paso Máis deu por finalizado o seu circuíto escolar de deporte adaptado e inclusivo coa súa última visita ao CPI Plurilingüe Cabo da Area do concello de Laxe. Nesta xornada final participaron máis de 200 escolares, abarcando desde a etapa de infantil ata 4º da ESO.
Precisamente, a gran novidade desta edición foi a incorporación a estas actividades do alumnado de secundaria. A resposta dos mozos e mozas foi marabillosa, demostrando un alto nivel de sensibilidade e comprensión, á par dun gran entusiasmo por practicar un deporte colaborativo e non competitivo. A pesar das altas temperaturas e da forza do sol, tanto o alumnado como os monitores voluntarios da asociación gozaron dunha estupenda mañá de xogos e aprendizaxe.
Desde a entidade quixeron resaltar e agradecer a enorme implicación do profesorado do centro de Laxe, que participou con entusiasmo e saber facer en todo momento.
Un circuíto en expansión e récord de participación
Con esta última parada péchase o circuíto deste ano, que incluíu aos habituais colexios de Carballo (Xesús San Luis Romero, Nétoma-Razo, A Gándara-Sofán, A Cristina, Bergantiños e o CRA Ponte da Pedra), sumando nesta ocasión novas incorporacións como o mencionado CPI Plurilingüe Cabo da Area de Laxe, o CEIP As Forcadas de Corme e o CEIP Valle Inclán da localidade pontevedresa do Grove. O éxito foi tal que a entidade sinalou que xa contan con novas peticións de centros para o próximo curso escolar.
En total, o circuíto alcanzou unha cifra récord de participación con preto de 1.500 nenos e nenas. O programa deste ano estivo composto, ademais de polas charlas explicativas e sensibilizadoras, polas disciplinas tradicionais de baloncesto en cadeira de rodas e blindfutbol (fútbol para cegos), ás que se engadiron como grandes novidades un circuíto para invidentes e o voleibol sentado.
Este crecemento foi posible grazas ao aumento do número de persoas voluntarias este ano, o que permitiu xestionar quendas de ata 100 escolares simultaneamente, logrando así optimizar o tempo dentro do horario escolar e dar cabida a un maior volume de alumnos.
Esperanza nun futuro máis inclusivo
Desde a directiva da Agrupación Deportiva Un Paso Máis manifestaron unha gran satisfacción polo resultado obtido e pola enorme implicación e entusiasmo de todas as partes implicadas.
Como reflexión final, os responsables da asociación destacan que, vendo o comportamento e a actitude dos nenos, nenas e docentes, hai razóns de peso para confiar firmemente nunha sociedade moito máis inclusiva nos próximos anos.
Este xoves, a entidade pecha a actividade de xadrez educativo no CEIP Plurilingüe de A Gándara-Sofán cunha xornada de portas abertas onde o alumnado poderá compartir o espazo cos seus pais. Ao remate, entrega de premios e diplomas.