Un operario tamén foi trasladado en helicóptero tras caer dun tellado en Val do Dubra.
Un home perdeu a vida este luns na Coruña, ao caer dun tellado, o falecido traballaba na cuberta do IES Agra do Orzán, situado na rúa do Alcalde Liaño Flores, cando caeu desde varios metros de altura. Foi o persoal de Urxencias Sanitarias de Galicia-061 o que alertou ao 112 Galicia, minutos antes das 18 horas.
Desde o Centro Integrado de Atención ás Emerxencias activouse de inmediato un operativo no que tamén colaboraron os axentes da Policía Nacional.
Unha vez no lugar, os profesionais sanitarios só puideron confirmar o falecemento do traballador. Fontes da Policía Nacional ratificaron que se investigan as causas do accidente laboral.
Un operario trasladado en helicóptero tras caer dun tellado en Val do Dubra
O accidente laboral produciuse no lugar de Vilar, en Buxán, no municipio de Val do Dubra.
A información chegou ao 112 Galicia a través dos efectivos de Protección Civil da localidade, que alertaban de que un operario caera dun tellado e resultara ferido.
De inmediato, desde a sala de operacións do 112 Galicia informouse ao Servizo de Urxencias Sanitarias de Galicia-061, que decidiu desprazar o helicóptero con base en Santiago de Compostela para atender e trasladar ao ferido, que se atopaba consciente nese momento.
Ademais, a Garda Civil tamén foi informada para colaborar na intervención do accidente.