Unha motorista perdeu a vida este mércores despois de chocar contra un autobús mentres circulaba pola PO-316, á altura do punto quilométrico 3.200, no concello pontevedrés do Grove.
Segundo informan fontes da Axencia Galega de Emerxencias, ás 14:00 horas un particular alertaba ó 112 Galicia de que había unha persoa ferida despois dun accidente no que se viron implicados dous vehículos. A muller atopábase inconsciente tras o impacto, aínda que liberada e accesible.
De inmediato, desde o 112 Galicia, activouse un operativo que contou coa participación dos profesionais de Urxencias Sanitarias de Galicia-061, dos Bombeiros do Salnés e tamén cos membros do GES de Sanxenxo e de Protección Civil da localidade.
Os axentes da Garda Civil de Tráfico e da Policía Local encargáronse de restablecer as condicións de seguridade na vía coa colaboración do persoal de mantemento das estradas. A pasaxe puido ser trasladada noutro autobús e ningún dos ocupantes resultou ferido.