O seu piso resultou completamente calcinado por un lume, que percibiron os veciños pasadas as tres da madrugada deste xoves. Así o reflectiron mediante as súas chamadas ao 112 Galicia, nas que insistían en que nesa casa vivía unha muller.
Con estes datos, os xestores do Centro Integrado de Atención ás Emerxencias de Galicia puxeron en marcha os correspondentes protocolos para a mobilización de Urxencias Sanitarias de Galicia-061, Bombeiros de Arteixo, Grupo Municipal de Emerxencias e Protección Civil. Tamén foron alertados os axentes da Policía Local e da Garda Civil.
Dirixíronse, entón, á rúa da Beiramar, onde se producía este incendio, que revelou unha nova vítima mortal, e deixou danos irreparables, pois toda a vivenda resultou calcinada. De feito, os pisos lindeiros deberon ser desaloxados como medida de seguridade.
Unha vez que os Bombeiros de Arteixo lograron as condicións necesarias para acceder ao interior do piso, localizaron o corpo sen vida dunha muller. Ademais, observaron que o lume puido iniciarse na habitación e estendeuse ao baño e ao salón-comedor.
Finalmente, os profesionais sanitarios só puideron confirmar o falecemento da muller, e, pouco a pouco, os ocupantes das vivendas lindeiras foron retornando en canto as condicións melloraron.