- O accidente produciuse arredor das 22:00 horas no punto quilométrico 6 da PO-510. Outra das vítimas, ferida de gravidade, tivo que ser trasladada ao Hospital Álvaro Cunqueiro
Venres negro nas estradas galegas. Unha nai e os seus dous fillos, ambos menores, perderon a vida esta pasada noite tras colidir dous turismos no punto quilométrico 6 da PO-510, entre os municipios de Salceda de Caselas e Salvaterra de Miño (Pontevedra), arredor das 22:00 horas. Ademais, outra persoa resultou ferida de gravidade no sinistro e tivo que ser trasladada ao Hospital Álvaro Cunqueiro.
Segundo confirmaron os Bombeiros do Baixo Miño ao 112 Galicia, os membros do Servizo de Prevención, Extinción de Incendios e Salvamento tiveron que excarcerar a tres persoas atrapadas, dúas nun vehículo e unha no outro coche implicado.
No operativo tamén participaron profesionais do 061, axentes da Garda Civil de Tráfico, da Policía Local e da Agrupación de Voluntarios de Protección Civil de Salceda de Caselas.