- Afirmou sentirse «preparado» para gobernar España e sinalou que o seu obxectivo é «gañar a Pedro Sánchez»
O presidente do PPdG e da Xunta de Galicia, Alberto Núñez Feijóo, confirmou a súa candidatura a presidir o PP a nivel nacional. Fíxoo este mércores nun acto multitudinario no Multiusos Fontes do Sar, en Santiago de Compostela, onde dixo sentirse «preparado» para liderar un partido «unido, integrador, sólido e solvente» que terá claro cando dicir que si e cando opoñerse.
Feijóo tamén destacou que non quere insultar ao presidente do Goberno de España, senón que o seu obxectivo é «gañar a Pedro Sánchez». Un acontecemento que el definiu como «posible» se «todos os concellos, provincias e comunidades autónomas imos a unha».
Pendentes do XX Congreso Nacional Extraordinario que se celebrará os días 1 e 2 de abril, o presidente da Xunta sinalou que se presentarán varias candidaturas pero que só haberá un derrotado: «o multipartito socialista, comunista e nacionalista».