- Segundo o presidente, os expertos non descartan un rebrote de coronavirus despois do verán
O presidente do Goberno galego, Alberto Núñez Feijóo, convocou este mércores aos partidos políticos galegos para abordar a convocatoria electoral, tras coñecer os informes dos expertos que sitúan o principio do verán como o momento máis seguro.
Despois de que a pandemia obrigase a suspender o proceso electoral previsto para o 5 de abril, e co compromiso de activalo de novo “no prazo máis breve posible”, Feijóo trasladou hoxe o contido dos informes sanitarios e do informe da Asesoría Xurídica da Xunta. O presidente trasladou que os expertos coinciden en que o momento que pode ofrecer menos incertezas para poder votar é o principio do verán, sendo a seguridade sanitaria maior canto antes se celebren os comicios.
«Os modelos epidemiolóxicos non descartan un novo pico da enfermidade con máis probabilidade despois do verán”, engadiu o responsable do Executivo galego, que espera que este xoves o resto de partidos políticos expoña as súas opinións para poder celebrar canto antes os comicios galegos.