Unha saída de vía na DP-1601, ao seu paso pola parroquia da Ponte do Porto, en Camariñas, obrigou a trasladar a unha persoa. Segundo informaba un particular ao 112 Galicia, arredor das 00:00 horas da madrugada deste sábado, un vehículo saíuse da vía nese punto, e, ao parecer, había unha persoa que necesitaba asistencia sanitaria.
Nese momento, desde o CIAE-112 Galicia deuse aviso a Urxencias Sanitarias de Galicia-061, aos Bombeiros de Cee e á Garda Civil.
Unha vez no lugar, os servizos de emerxencia desprazados, informaban ao 112 Galicia de que a persoa ferida ía ser trasladada a un centro hospitalario por mor das feridas que presentaba.
Por mor do sinistro, a estrada estivo cortada ao tráfico, en ambos sentidos da circulación, debido a unha mancha de aceite. Con todo, o tráfico pronto foi restablecido tras garantir as condicións de seguridade da vía.