O executivo de Alfonso Rueda decidiu denegar a Autorización Ambiental Integrada, indispensable para que o plan seguise adiante. A Xunta toma a súa decisión tras meses de protestas ao redor dun proxecto que concitou unha crítica unánime en ámbitos políticos, sociais e ecoloxistas. O Goberno galego explica a súa decisión apuntando ao executivo de Pedro Sánchez como responsable e argumenta que non se pode autorizar unha industria para a que non hai prevista unha conexión eléctrica que sería indispensable para a súa posta en funcionamento. A Conselleira de Economía, María Jesús Lorenzana, foi a encargada de confirmar a decisión política que arrastra ao caixón o principal proxecto industrial da era Alfonso Rueda á fronte da Xunta: “Procederase ao arquivo formal do expediente de Altri”, sinalou en declaracións aos medios. A decisión pon fin ao maior envurullo social e político no que se involucrou Rueda desde a súa chegada ao cargo. A contestación social ao proxecto converteuse desde hai máis dun ano no único asomo de oposición que ensombrecía a maioría absoluta obtida polo PP nas eleccións de hai agora dous anos.