O presidente do Goberno galego, Alberto Núñez Feijóo, asegurou este venres, durante a presentación de Turismo de Galicia en Fitur 2020, que o Xacobeo 2021 mostrará ao mundo non só a mellor Galicia da historia, senón a mellor Marca España, e convocou deste xeito a apostar por un recurso que une a todos, con independencia das crenzas, ideoloxías, culturas ou costumes.
“Non hai nada máis transversal en Europa que o Camiño de Santiago”, dixo, lembrando a diversidade de visitantes que Compostela leva acollendo durante séculos. Nesta liña, resaltou que un dos atractivos do expositor da Comunidade nesta feira internacional de turismo é o chamado túnel do Camiño, unha experiencia que permite ao visitante mergullarse nos dez itinerarios xacobeos e converterse nun peregrino.
