A primeira xornada de cesamento do fogo en Gaza, que entrou en vigor a madrugada do venres, estivo salpicada por incidentes illados na Cisxordania ocupada e Xerusalén. A Chaira das Mesquitas da Cidade Vella foi escenario dalgúns deles. Enfrontamentos que foron obxecto da crítica de Nacións Unidas, que esixiu que se respecten os lugares sacros e «evitar as provocacións que poidan facer subir a tensión».
O presidente de Estados Unidos, Joe Biden, instou a «deter a violencia entre comunidades, entre os extremistas dos dous lados». E asegurou que non houbo ningún cambio no seu compromiso coa seguridade de Israel, pero insistiu en que unha solución de dous estados que inclúa un estado para os palestinos segue sendo «a única resposta» a ese conflito. Todo tras 11 días de lume cruzado e máis de 250 mortos, a maioría palestinos, na escalada bélica máis grave na rexión en sete anos.