Galicia contará con centros provinciais de atención 24 horas ás vítimas de agresión sexual

As vítimas de agresión sexual contarán con catro centros de referencia, un por provincia, onde poderán recibir atención as 24 horas do día. A conselleira de Emprego e Igualdade, María Jesús Lorenzana, adiantou no pleno do Observatorio Galego da Violencia de Xénero, que a Xunta está a elaborar un estudo diagnóstico cara á implantación e localización destes puntos, que situarán a Galicia na cabeza da loita contra a violencia sexual. Por medio destes centros prestarase acompañamento e realizaránse intervencións psicolóxicas ou sociais de forma presencial, en liña e telefónica, a todas as vítimas e superviventes que teñan sufrido violencia sexual no pasado ou no presente. Tamén aos seus familiares que o necesiten ou a persoas do seu entorno íntimo.