- Toda a hostalería deberá pechar as súas portas ás 18:00 horas
A Covid-19 segue imparable na comunidade galega, superando este mércores os 9.400 casos. Ante esta situación, o presidente do Goberno galego, Alberto Núñez Feijóo, anunciou as novas medidas adoptadas para frear a expansión desta pandemia; unhas medidas que estarán en vigor este venres e que durarán «probablemente ata mediados de febreiro».
En primeiro lugar, todos os concellos galegos pasan automaticamente aos dous niveis de alerta máis altos, motivo polo cal toda a hostalería galega deberá pechar as súas portas ás 18:00 horas. Ademais, adiántase o toque de queda ás 22:00 horas en toda a comunidade e as reunións serán dun máximo de catro persoas non conviventes.
Feijóo lembrou que o peche perimetral de Galicia segue activo e recomendou aos cidadáns que fagan o «esencial», véxase ir ao traballo, coledio ou ao médico.
Medidas nas zonas cun nivel medio-alto de restricións
- As reunións serán dun máximo de catro persoas.
- O toque de queda adiántase ás dez da noite.
- O comercio deberá pechar como máximo ás 21:30 e as tendas estarán ao 50 % da súa capacidade.
- A hostalería e restauración poderán abrir ata as 18 horas, cun 30% de aforo no interior e do 50% nas terrazas, podendo manter a entrega a domicilio.
- Non se poden facer reunións de non conviventes nos domicilios a partir das 18:00.
- Os centros recreativos só poden estar ao 50 % da súa capacidade.
- As actividades deportivas non federadas contarán con grupos de máximo catro persoas, e no interior os aforos non superarán o 50%.
- Nos cines, teatro e auditorios o límite máximo de persoas sentadas será de 250 nos espazos pechados, e de 500 ao aire libre.
- As visitas hospitalarias se circunscriben a unha persoa por paciente en todos os hospitais do Sergas, salvo casos excepcionais.
- Respecto á mobilidade, os concellos neste nivel non se pechan, agás as cidades de Lugo, Pontevedra e Vigo.
Medidas nas zonas de máxima restrición
- Os concellos quedan illados de xeito individual.
- O interior da hostalería estará pechada e só se poderá atender nas terrazas ata as 18:00, aínda que segue funcionando entrega a domicilio.
- Os establecementos de xogo estarán pechados ao público.
- Nos centros comerciais reducirase a capacidade nas tendas ao 30 %.
Os 60 concellos que estarán as vindeiras semanas neste nivel máximo de restricións son, na provincia da Coruña: A Coruña, Arteixo, Cambre, Culleredo, Oleiros, Carballo, Santiago de Compostela, Ames, Ribeira, Boiro, Rianxo, Noia, Ferrol, Narón, Fene, Cee, Camariñas, Cerceda, Laxe, Vimianzo, Cabanas, Pontedeume, Ortigueira, Outes, Porto do Son, A Pobra do Caramiñal, Melide, Oroso, Trazo e Val do Dubra. Na provincia de Lugo: Vilalba, Viveiro e Xove. Na provincia de Ourense: Ourense, Barbadás, Carballiño, Verín, Allariz, Monterrei e Xinzo de Limia. E, na provincia de Pontevedra: A Estrada, Poio, Bueu, Moaña, Baiona, Ponteareas, Redondela, A Guarda, Tomiño, Tui, Vilagarcía, Vilanova, A Illa de Arousa, Valga, Pontecesures, Caldas de Reis, Cuntis, Oia, O Rosal e Salvaterra de Miño.
Apoio ao sector da hostalería
Feijóo aproveitou a comparecencia para referirse novamente á hostalería, un sector, recordou, que sofre máis que ningún outro ao estar máis exposto. “Seguiremos tentando mitigar o seu sufrimento con axudas específicas”, garantiu, subliñando que máis de 14.700 negocios de hostalería xa recibiron apoio económico directo da Xunta, o que supuxo un desembolso de 21,5 millóns de euros.
O presidente da Xunta pediu aos cidadáns que sigan en alerta e que non se confíen polo feito de que o proceso de vacinación comezara.