O eurodeputado Nicolás González Casares poñía este mércores de manifesto a ineficacia da Xunta de Galicia na captación de proxectos de enerxías renovables de impacto para a comunidade. O socialista responsabiliza ao presidente Alfonso Rueda de “»ntentar tapar a súa propia incompetencia» ao quedar fóra dos fondos europeos o proxecto do hidroducto Guitiriz-Zamora.
Casares destaca o compromiso de Enagás e Reganosa de encargarse da construción do hidroducto e di que as críticas de Rueda cara ao mapa enerxético da Comisión Europea só son unha escusa para desviar a atención da súa falta de traballo coas institucións europeas. O eurodeputado destaca que a decisión sobre o hidroducto é «puramente europea e baseada no seu regulamento» e non está suxeita á influencia do goberno español.
Casares lamenta a falta de coñecemento e habilidade negociadora do presidente da Xunta en asuntos europeos, pois a falta de poder e influencia de Rueda evidénciase na decisión tomada en Bruxelas. «Ver como anda desorientado en todas as decisións europeas», apunta.
Por outra banda, Casares acúsao de “omitir deliberadamente” o respaldo da Comisión Europea á interconexión eléctrica do norte de Portugal con Galicia, un proxecto que resultaría moi beneficioso para a produción de hidróxeno verde e reforzaría a seguridade dos seus produtores na comunidade. Outro dos proxectos que a Xunta tamén pasou por alto foi o dos electrolizadores (para transformar a auga en hidróxeno). Así pois, Nicolás González insta o goberno galego a facer autocrítica sobre a súa xestión cando proxectos tan cruciais para Galicia, como estes, están en xogo.