- O lume comezou minutos antes das once da mañá e a nave, pertencente á empresa Ingaroil, ardeu por completo
Mal inicio de semana para a empresa Ingaroil tras sufrir un grave incendio na súa nave situada no polígono industrial de Catro Ventos, en Santa Comba. O lume produciuse minutos antes das once da mañá deste luns e foron varios particulares os que alertaron ao 112 Galicia. De inmediato se mobilizaron aos bombeiros da localidade así como de Cee e Carballo. Tamén se desprazaron ata o lugar o Grupo de Apoio Loxístico (GALI) da Axencia Galega de Emerxencias para prestar apoio cunha cisterna de 25.000 litros de auga e un dron para captar posibles novos focos.
No operativo tamén participaron efectivos de Protección Civil e Policía Local de Santa Comba, así como axentes da Garda Civil e do Seprona ademais de membros do GES de Brión.
Segundo sinalan desde o 112 Galicia, a nave de Ingaroil -empresa que se adica á reciclaxe de aceite usado- ardeu por completo e un dos seus traballadores tivo que ser atendido polos seus compañeros ao sufrir un forte golpe no nocello mentres fuxían das instalacións. Finalmente foi trasladado en ambulancia a un centro hospitalario de Santiago de Compostela.