O Consello de Seguridade da ONU foi escenario dunha dura disputa dialéctica entre o Secretario Xeral da ONU e o ministro de Exteriores israelí no tema de Gaza. António Guterres denunciou as «claras violacións» do dereito humanitario na franxa por parte de Israel e pediu un «cesamento do fogo humanitario inmediato». Guterres tamén sinalou que «os ataques de Hamás do 7 de outubro non veñen da nada, e que o pobo palestino estivo sometido a 56 anos de ocupación asfixiante».
O representante palestino denunciou a inactividade das Nacións Unidas debido aos vetos e bloqueos dos aliados de Israel. E o ministro de Relacións Exteriores de Israel, Eli Cohen, expresou abertamente o seu desgusto á declaración de Guterres ante o Consello de Seguridade, e mesmo cancelou a súa reunión co secretario xeral.
«Señor Secretario Xeral, en que mundo vive ? Definitivamente, este non é o noso mundo», replicou Cohen.
O embaixador israelí na ONU, Gilad Erdan, foi máis aló, e esixiu a renuncia de António Guterres, a quen acusou de ser «comprensivo fronte ao terrorismo e aos asasinatos» de Hamás.