O Bergantiños xogou un encontro no que se sentiu cómodo diante e seguro atrás. Cun bo inicio de partido o premio chegaba para os de Secho no minuto 12 por mediación de Mario Musy, 0-1. A penuria acentuábase para o Barbadás que non se viña abaixo, pero o mazazo recibírono ao fío da media hora de partido por mediación de Jorge Cano, que establecía o 0-2 no luminoso do Municipal de Os Carrís. O 1-2 definitivo chegaba en forma de pena máxima a favor do conxunto local e que transformaba Xinzo a vinte minutos para o final. Con dúas vitorias consecutivas o Bergantiños FC sitúase en segunda posición a tres puntos da UD Ourense que é primeiro con 13. O próximo rival dos de Secho será o Polvorín que visitará As Eiroas o vindeiro domingo 15 ás seis da tarde.
O Paiosaco, pola súa banda, non pasou do empate na Porta Santa ante o Arteixo. Dani Fernández igualou a contenda para os locais que comezaron perdendo tras un gol de Cañi no minuto 34. Co punto conseguido este domingo, o Paiosaco suma 6 na xeral e sitúase no posto número 11.