- En Carballo tamén foi necesario pechar o paseo do Anllóns, na zona da Estación de Autobuses, por desprendementos de ramas das árbores.
A Policía Local da Laracha procedeu este mércores ao peche do acceso ao paseo fluvial do río Vilán, na parroquia de Cabovilaño, ante a caída dunha árbore. Os efectivos do corpo municipal de seguridade acordoaron os dous accesos, un xunto á glorieta da autoestrada AC-552 en O Cancelo e, o outro, na estrada que dirixe ao Igrexario á altura do lugar de O Vilar.
Este suceso provocou importantes danos nun tramo da pasarela de madeira, pero afortunadamente non se produciu ningún de tipo persoal. O Concello retirará a árbore caída a maior brevidade e realizará unha avaliación dos danos que presenta o paseo fluvial antes de proceder á súa reparación.
Por outra parte, o temporal tamén causou incidencias, neste caso de pequena entidade, en puntos da rede viaria municipal. O máis destacado rexistrouse na estrada local A Laracha-Cerceda á altura da subida ao miradoiro de Santa Marta -entre os lugares de A Xesta e Compañeiro-, onde a forza da auga arrastrou terra á estrada. Xa se realizaron as intervencións oportunas para limpar a zona, restablecer a normalidade e garantir a seguridade viaria.