A concelleira de Servizos Sociais, Igualdade e Sanidade, Maica Ures, foi a encargada de presentar o acto de inauguración do Xardín do Xestal neste 28 de xuño, facéndose eco de que en Carballo “creamos xardíns para que as liberdades e os dereitos das persoas medren igual que as flores”.
Dous nenos carballeses, Carla Trigo e Raúl Lista, alumnos do CEIP Plurilingüe A Cristina, que traballou durante o curso na recuperación da memoria do gran humorista e folclorista a través dos testemuños recollidos polos nenos e nenas entre as súas familias. O resultado foi un percorrido moi completo pola vida de Carlos Díaz Gestal, que compartiron coa veciñanza que se achegou ata o Parque do Anllóns para participar no acto.
O alcalde lembrou algúns dos moitos momentos que viviu con Carlos O Xestal, pero detívose especialmente na súa loita por conseguir levar a luz eléctrica á parroquia de Lema e por preservar o ecosistema de Baldaio. Ao tempo que un grupo de escolares facían voar os papaventos elaborados por eles mesmos no obradoiro que organizou a Concellaría de Igualdade, a música do dúo Curuxa, con Pablo Moreira á guitarra e Cecilia Burillo ao violoncello, soou como peche do acto.
Queixa da oposición
O voceiro do PP, Rubén Lorenzo, expresou nas redes sociais a súa disconformidade polo xeito de organizar este acto. «Mágoa que por parte do goberno municipal, nin da concellería de Igualdade, se nos invitase ao resto dos grupos da corporación a este acto, semella que os que NON votaron ao BNG non teñen dereito a estar representados neste tipo de iniciativas que, ao noso modo de ver, deben estar fóra de calquer tipo de partidismo e ideoloxía. (Entre outras cousas porque son financiadas cos cartos de TOD@S os carballeses e carballesas)», concluíu.
