- Varios veciños das vivendas quedaron sen luz
Un incendio nun transformador eléctrico deixou a varias persoas sen luz nas súas vivendas no complexo de Área Central, en Santiago, e unha persoa enferma tivo que ser evacuada ata o restablecemento do subministo.
Os sucesos ocorreron pasadas as sete desta mañá de xoves, cando pequenas explosións e unha fumareda alertaron aos veciños e ao persoal de seguridade do Centro Comercial.
A orixe do fume e das explosións foi un transformador instalado no acceso ao aparcamento. Debido a esta situación, varias vivendas quedaron sen luz e mesmo tivo que ser evacuada unha muller enferma que necesitaba dun respirador automático.
Ata o lugar dos feitos achegáronse efectivos do 112 Galicia, voluntarios de Protección Civil de Santiago, os bombeiros da cidade e os técnicos para restablecer a subministración eléctrica nas vivendas afectadas.