Portos de Galicia, vén de iniciar as obras de reposición da cuberta da lonxa vella do peirao de Sada, que na actualidade se utiliza como nave de redes. Así o trasladou a presidenta do ente público, Susana Lenguas, nunha visita á zona.
Trátase dunha actuación de mellora das condicións do sector profesional de Sada na que Portos de Galicia inviste máis de 40.000 euros e que pon ademais en valor o edificio que conta con protección patrimonial. Os traballos comezaron a semana pasada e contan cun prazo de execución de catro meses.
As obras consisten na reposición da cuberta que afecta á nave sur da lonxa, formada por dúas naves comunicadas por un corredor interior. Esta zona presenta filtracións de auga, humidades e acumulación de vexetación, entre outras deficiencias polo que será substituída. O material a empregar na reposición así como as actuacións complementarias de recollida e baixada de augas pluviais suporán unha mellora substancial da calidade e duración da nova cuberta e conserva o patrimonio portuario.