O presidente da Xunta, Alberto Núñez Feijóo, destacou este xoves o inicio da tramitación da ampliación do Hospital Clínico Universitario de Santiago, que sumará máis de 30.000 m2 de superficie. “Imos finalizar o compromiso dos grandes hospitais renovados, ampliados ou de nova edificación do Servizo Galego de Saúde”, abundou.
A ampliación farase ao abeiro da Lei 3 de proxectos públicos de urxencia ou excepcional interese, xa que o emprego deste instrumento xurídico está xustificado polas necesidades derivadas da asistencia sanitaria e da pandemia.
Nos próximos días se solicitará ao Concello de Santiago o trámite de información pública do anteproxecto e o informe sobre a afectación dos intereses locais , posteriormente a Consellería de Medio Ambiente solicitará os informes preceptivos e elevará o proxecto á Comisión Superior de Urbanismo de Galicia. Finalmente, dixo, será aprobado polo Consello da Xunta.
Froito desta obra, executaranse dous edificios: un deles, de 9 andares, incluirá áreas de diagnóstico, tratamento, servizos centrais e unidades de hospitalización; e o outro, de 5 andares, albergará o hospital de día e as consultas externas.