Garda Civil, Protección Civil, unha unidade canina e voluntarios unidos buscaron sen pausa este domingo a Galia Baba Chamah, a moza de orixe saharauíde de 24 anos de idade e da que non se sabe nada desde este sábado en Carballo. O amplo dispositivo estivo centrado nas parroquias de Bértoa e Carballo, inmediacións onde a moza foi vista por última vez. Protección Civil difundiu fotografías e a súa descrición; de complexión delgada, uns 43 quilos e mide 1,51 metros de estatura. Os seus achegados piden colaboración para tratar de localizala e calquera persoa que teña algunha pista se poña en contacto coa Garda Civil ou Protección Civil. Tamén se fixeron públicos os números de teléfono aos que chamar en caso de ter algún dato que poida achegar información a esta desaparición, e que figuran no seguinte cartaz.
