O Ministerio do Interior lanzou o logo oficial dos comicios locais do próximo 28 de maio, así como a páxina web elecciones.locales2023.es na que se recolle información relevante para os cidadáns sobre como exercer o seu dereito ao voto, o calendario electoral, ou as distintas candidaturas que se presentan, entre outras cuestións.
A web presenta un deseño atractivo e moderno, o que facilita unha navegación amigable polos distintos contidos que se integran ao redor de catro grandes apartados: información xeral, formacións políticas, persoas que integran as mesas e accesibilidade.
Os electores poderán resolver neste portal calquera dúbida sobre as modalidades de voto presencial ou por correo; sobre os horarios de apertura dos colexios; ou sobre os documentos de identificación persoal que se deberán presentar nas mesas electorais.
Un apartado importante é o dedicado á accesibilidade no que se inclúe información xeral tanto para as persoas que acoden ao local electoral a votar como para as persoas forman parte das mesas electorais. Neste último caso, incídese especialmente nas persoas xordas e cegas ou con discapacidade visual e nas ferramentas postas á súa disposición para exercer as súas funcións nunha mesa electoral.
A páxina web está dispoñible en castelán, catalán, galego, eúscaro e valenciano e, como novidade este ano, tamén en inglés co obxectivo de facilitar información a aqueles estranxeiros residentes no noso país que teñen recoñecido o seu dereito para participar nas eleccións locais.