Lampedusa recibe un dos maiores desembarcos de migrantes dos últimos anos. 686 persoas chegaron á illa italiana nun vello pesqueiro de 15 metros de eslora no que viaxaban amoreados. Entre eles había mulleres e nenos, procedentes de distintos países de África e Asia. Saíran desde as costas de Libia. Tras ser interceptados, a Garda Costeira acompañounos ao porto Favarolo. Alí sometéronse ao protocolo de identificación e triaxe polo coronavirus. Logo foron trasladados ao centro de acollida da illa, onde actualmente hai máis de mil persoas a pesar de ter capacidade para a cuarta parte. O ano 2021 trae consigo cifras récord de chegada de migrantes a Italia. Case 45.000 persoas desembarcaron nas costas italianas nos primeiros nove meses do ano, case o dobre que o ano pasado. Cifras que superan con fartura ás rexistradas noutros países.
35