Máis dunha semana despois do inicio dunhas inundacións históricas, boa parte de Emilia-Romaña continúa asolagada e en alerta vermella polo risco de que se produzan desprendementos de terra. 14 persoas morreron e 23.000 persoas permanecen desaloxadas dos seus fogares, mentres nas cidades continúa, incesante, o traballo de drenaxe e limpeza. Con axuda de tractores, os equipos de rescate reparten alimentos entre a poboación.
O Goberno italiano decretou este martes axudas por máis de 2.000 millóns de euros para paliar os danos causados por estas inundacións. Entre estas axudas hai exencións fiscais e indemnizacións ás empresas afectadas polo desastre. E é que os danos son descomunais nesta rexión considerada “o verxel de Italia”. Miles de hectáreas de cultivos, árbores froiteiras e zonas gandeiras quedaron arrasadas. Ao redor de 10 millóns de árbores froiteiras resultaron danados.