O primeiro tenente de alcaldesa e concelleiro de Turismo, Juan Ignacio Borrego, presentou o concerto de James Blunt que inaugurará as Festas de María Pita. Será o primeiro do ciclo «Noites de María Pita», que incluirá 11 concertos de destacados artistas. Borrego sinalou que o programa deste ano é dos máis completos da historia das festas coruñesas, deseñado especialmente para a dinamización da cidade tras a recuperación total da presencialidade e coas «enormes ganas do público de gozar de espectáculos de alta calidade». A respecto da programación das festas que comezan o próximo luns, Juan Ignacio Borrego sinalou que é moi ambiciosa e diversa, e encherá a cidade de música, teatro, arte e propostas de ocio para todos os públicos, coa vocación de integrar os barrios e «celebrar a actividade cultural en todo o seu esplendor».