O presidente dos Estados Unidos, Joe Biden, e o xefe do Executivo español, Pedro Sánchez, mantiveron este venres a súa primeira reunión bilateral na Casa Branca, na que falaron de materia migratoria, ambiental e de defensa, entre outros temas. A modo de benvida, Biden agradeceu a España o seu apoio con Ucraína, mentres que Sánchez destacou a “excelente” relación entre os dous países: “Somos aliados, amigos”. Ao comezo da reunión no Despacho Oval, que durou 45 minutos a porta pechada, Biden trasladou ante os xornalistas o seu agradecemento polo apoio que España está a brindar a Ucraína durante a guerra e polo acordo alcanzado para acoller migrantes xunto a Canadá. “Xuntos axudamos a Ucraína, non podo agradecercho suficiente”, dixo dirixíndose a Sánchez. Ademais, asegurou que traballarán con España durante a Presidencia da UE que comeza en xullo.
0