Os bombeiros liberaron na mañá deste sábado a unha persoa que quedou atrapada no interior dun turismo despois de producirse unha colisión frontal entre un coche e un autobús en Abegondo.
Foron os profesionais de urxencias médicas que chamaron ao 112 Galicia os que informaron do desprazamento dunha das súas ambulancias ata a DP-0105 para atender a un accidente de tráfico. De acordo coa información facilitada aos xestores do 112, tratouse dun choque entre un ómnibus e un turismo ao seu paso pola parroquia de Vilacova.
Como consecuencia do impacto, a persoa que conducía o coche quedou atrapada e non era quen de abandonar o vehículo polos seus propios medios, o que obrigou a intervir aos efectivos do Servizo de Prevención, Extinción de Incendios e Salvamento de Betanzos.
Unha vez no lugar, os bombeiros fixeron uso do material de excarceración para liberar á persoa, que puido ser evacuada ao centro hospitalario de referencia polo equipo de Urxencias Sanitarias de Galicia-061.
Segundo puido saber o 112, o autobús non transportaba pasaxeiros e o seu condutor resultou ileso.
Cómpre sinalar que neste operativo participaron tamén os axentes da Garda Civil de Tráfico. Ademais, desde o 112 avisouse aos membros do GES de Curtis e Protección Civil de Abegondo.