Unha colisión entre dous vehículos na Rúa da Torre, en Vimianzo, deixou a un ocupante atrapado. Así, tras recibir a alerta, o 112 Galicia solicitou a intervención dos Bombeiros de Cee para liberar ao ferido e facilitar a atención do equipo sanitario.
Tratouse dun choque do que foi testemuña a persoa que chamou ao número único de emerxencias cando faltaban dez minutos para as oito da mañá deste mércores. Segundo explicou, o impacto entre os dous vehículos, unha furgoneta e un camión, deixou a un dos ocupantes atrapado polos ferros dun dos vehículos, o que fixo necesaria a actuación dos bombeiros. Unha vez liberada, a persoa recibiu a asistencia do equipo de Urxencias Sanitarias de Galicia-061 para posteriormente ser trasladada ao hospital.
Neste operativo participaron, ademais, os axentes da Garda Civil de Tráfico. Tamén foron informados os voluntarios de Protección Civil de Vimianzo.