- O programa contempla a execución de traballos de mantemento, mellora do firme e reparación de fochancas das estradas da rede provincial.
A Deputación da Coruña vén de abrir o proceso de licitación pública do Plan de Conservación de Vías Provinciais para o ano 2019, dotado cun orzamento de 7.899.525 euros. Dese orzamento, preto dun milón de euros invertiráse en estradas provinciais da Costa da Morte.
A licitación realízase de forma integramente electrónica, a través da Plataforma de Contratación do Estado (www.contrataciondelestado.es), tal como establece a nova Lei de contratos de sector público. Nesta plataforma publícanse os pregos, anuncios de licitación, consultas a provedores e desenvólvense todos os trámites ata a adxudicación definitiva do contrato.
O deputado responsable da área de Vías e Obras da institución provincial, José Manuel Pequeño, explicou que este programa contempla a execución de traballos de mantemento, mellora do firme e reparación de fochancas nos máis de 2.000 quilómetros de estradas cos que conta a rede viaria da Deputación. Todas estas actuacións están destinadas a “mellorar as condicións de circulación, aumentar a seguridade viaria nas estradas coruñesas e reducir a sinistralidade», afirmou.
Pequeño lembrou que ademais do Plan de conservación, o servizo de Vías e Obras da Deputación ten en marcha un programa destinado exclusivamente á roza e limpeza das marxes das estradas provinciais. Estas tarefas son obxecto dun contrato independente do Plan de Conservación, co obxectivo de mellorar e axilizar este servizo no que se inclúe a limpeza das marxes de todas as estradas, para facilitar a visibilidade e a circulación, evitar a propagación de incendios e incrementar a drenaxe de augas pluviais.
Tramos e inversión na Costa da Morte:
| GRUPO 17.- CARBALLO, CERCEDA E A LARACHA | 405.971,93 |
| GRUPO 18.- CABANA, MALPICA E PONTECESO | 214.788,12 |
| GRUPO 19.- CAMARIÑAS, LAXE, MUXÍA E VIMIANZO | 140.776,78 |
| GRUPO 20.- CEE, CORCUBIÓN, DUMBRÍA E MAZARICOS | 173.378,30 |