A Garda Civil da Coruña localizou dous talleres clandestinos que se dedicaban á reparación de vehículos en Cambre e Oza-Cesuras. Esta operación enmárcase na campaña de vixilancia e detección de talleres ilegais clandestinos, é dicir, aqueles que non están rexistrados oficialmente e carecen de licenza municipal.
Un dos talleres situábase no polígono de Espírito Santo en Cambre, onde traballaban a porta pechada e sen ningún tipo de sinalización. A investigación iniciouse ao atopar verteduras de augas residuais na canalización de pluviais do polígono, que proviñan do correspondente lavado das pezas que había no local.
O segundo taller foi localizado nos anexos dunha vivenda próxima ao núcleo de Oza-Cesuras. Os efectivos da Paprona localizaron un depósito de numerosos vehículos despezados, constatando o aproveitamento das súas pezas para a reparación doutros e o desenvolvemento de actividades de reparación de chapa e pintura, sen as pertinentes autorizacións. A empresa receptora das pezas tamén foi inspeccionada pola Garda Civil ao incumprir a normativa sobre trazabilidade e xestión deste tipo de residuos.
Estas actividades ilegais poñen en risco a seguridade ambiental e prexudican a libre competencia, podendo constituír ademais un campo de cultivo propicio para o fraude fiscal, tributario e da seguridade dos traballadores.