O zulo foi localizado por un paseante no departamento de Yonne, ao sur de París. A Fiscalía Nacional Antiterrorista abriu unha investigación por asociación de malfeitores con fins terroristas. As pescudas foron confiadas á Subdirección Antiterrorista da policía francesa, engadiron as fontes sen detallar o tipo nin a cantidade de explosivos atopados. A policía sospeita que podería pertencer á banda terrorista ETA.
A canle «France 3» apuntou que a priori se trata dun agocho antigo, no que había «inscricións en eúscaro». A emisora «France Info» engadiu que o zulo foi detectado o martes no bosque de Marmeaux e contiña explosivos, cartuchos e detonadores.
A banda deu por finalizado o seu desarmamento ao comunicar o 8 de abril de 2017 ás autoridades francesas unha lista de zulos nos Pireneos Atlánticos, departamento do que forma parte o País Vasco francés, e o máis utilizado pola organización terrorista na súa historia para esconder as súas armas.