Londres desafía a Bruxelas e esixe cambios no Protocolo irlandés

Londres bota un novo pulso á Unión Europea a propósito do Brexit. O ministro encargado da negociación, David Frost, esixiu unha revisión drástica do Protocolo relativo a Irlanda do Norte e, en caso contrario, ameaza con finiquitalo de maneira unilateral. O Protocolo foi negociado para evitar unha fronteira dura entre as dúas Irlandas e é legalmente vinculante. Pero agora Londres rexéitao. Bruxelas acusa pola súa banda a Londres de subscribir o Protocolo de mala fe. Frost foi precisamente un dos negociadores e agora recoñece que era consciente de que o seu Goberno non estaba de acordo con todo.