O presidente de Brasil asume o cargo disposto a restablecer os vínculos con Iberoamérica no seu primeiro día de Goberno. Para iso, levou a cabo unha maratoniana xornada de reunións con varios líderes mundiais, comezando co rei de España, Felipe VI, quen afirmou que espera que Brasil teña un papel internacional moi activo.
Lula tamén se reuniu co presidente de Bolivia, Luís Arce; con quen ten intención de establecer novas fórmulas de cooperación bilateral en «políticas sociais», «enerxía» e «subministración de fertilizantes», gran preocupación rexional desde o estalido da guerra en Ucraína.
Ademais, destaca a sesión co mandatario arxentino, Alberto Fernández, quen describiu a volta de Lula como o fin dos catro anos de «illamento» internacional do expresidente Bolsonaro.
Lula tamén se desprazou ata Santos en helicóptero para ofrecer as súas condolencias á familia de Pelé, por cuxo falecemento o Goberno de Brasil decretou tres días de loito oficial. E é que «poucas persoas como Pelé», dixo Lula ao saber da súa morte, «levaron tan lonxe o nome de Brasil».