Máis de 200 empresas, entre establecementos de aloxamento e axencias de viaxe, adheríronse xa ao Bono Turístico da Xunta, unha iniciativa dotada con 5 M€ que busca inxectar liquidez nas empresas desta industria, fomentar o turismo interno, incentivar o consumo e impulsar a recuperación da economía e do tecido empresarial da Comunidade ante a crise da covid-19.
Así pois, entre os negocios que ofrecerán os seus servizos no marco deste programa atópanse a práctica totalidade dos Paradores da nosa Comunidade, hoteis de cinco e catro estrelas e preto de medio cento de axencias de viaxes. Do mesmo xeito, entre as empresas adheridas ao Bono Turístico figuran máis dunha vintena de establecementos de turismo rural, balnearios ou outros emprazamentos singulares como pazos, faros ou semáforos marítimos, conformando unha oferta de calidade e sustentable baseada nalgúns dos principais valores do modelo turístico galego, como son a enogastronomía, a paisaxe ou o termalismo.
Entre as opcións que ofertarán aos beneficiarios destacan produtos turísticos ou experiencias que deberán ofrecer un desconto mínimo do 15% sobre o prezo ordinario do servizo e cumprir coas medidas hixiénico-sanitarias adecuadas para garantir a máxima seguridade para traballadores e usuarios. Ademais, as empresas adheridas recibirán asesoramento por parte da Xunta e o Clúster de Turismo de Galicia sobre as dúbidas que presenten relacionadas coa operativa do mesmo.