O Boletín Oficial do Estado publicou a convocatoria para a concesión de axudas a pemes industriais dentro do ‘Programa Activa Industria 4.0’. Este programa, pertencente á familia de programas “Activa”, é unha iniciativa do Ministerio de Industria, Comercio e Turismo no desenvolvemento da súa Estratexia Nacional de Industria Conectada 4.0, que ten entre os seus obxectivos o impulso da transformación dixital da industria española, aumentando o seu potencial de crecemento e desenvolvendo á súa vez a oferta local de solucións dixitais.
A Escola de Organización Industrial (Fundación EOI), adscrita á Secretaría Xeral de Industria e PEME, será a encargada de xestionar esta iniciativa. A modalidade das axudas que se concedan no marco desta convocatoria terá a consideración de axudas en especie, consistentes na recepción dun asesoramento especializado e personalizado que permita o impulso da transformación dixital de pemes industriais á Industria 4.0.
O obxectivo das axudas do ‘Programa Activa Industria 4.0’ é ofrecer un diagnóstico e análise exhaustivo da situación dixital de partida da empresa e a elaboración dun Plan de Transformación, que inclúa a definición, cuantificación e priorización de oportunidades de dixitalización personalizadas.
Prestarase a través de reunións individualizadas coas pemes beneficiarias na sede destas, traballo remoto da entidade especializada e a realización de talleres grupais temáticos e demostrativos de apoio ao asesoramento e implantación das tecnoloxías correspondentes.
Poderán resultar beneficiarias empresas que teñan a condición de peme e cuxa actividade se refira á industria manufactureira, encadrada en Sección C – Divisións 10 a 32 (CNAE 2009).
A convocatoria permanecerá aberta ata que se esgote o crédito orzamentario establecido na mesma. As bases reguladoras poden consultarse no BOE.