Máis de 460.000 persoas visitaron as Illas Atlánticas durante a tempada de verán

Máis de 460.000 persoas visitaron o Parque Nacional das Illas Atlánticas de Galicia durante a tempada alta de verán, que segundo se recolle no Plan reitor de uso e xestión deste espazo natural se estende cada ano do 15 de maio ao 15 de setembro. Ao balance estacional, cómpre sumar o feito de que desde xaneiro xa son máis de 480.000 as persoas que pasaron por algún dos catro arquipélagos que conforman o Parque Nacional, polo que, de manterse este ritmo ata final de ano, a previsión é que se volva bater un novo récord de afluencia, como xa ocorrera en 2022, ao superarse as 490.000 visitas. Esta tendencia indica un interese crecente polos arquipélagos tradicionalmente menos coñecidos, como é o caso de Cortegada, no que destacan tanto as actividades educativas como de voluntariado ambiental que se desenvolven todo o ano.